timor Domini principium scientiae sapientiam atque doctrinam stulti despiciunt
habe fiduciam in Domino ex toto corde tuo et ne innitaris prudentiae tuae
in omnibus viis tuis cogita illum et ipse diriget gressus tuos
principium sapientiae posside sapientiam et in omni possessione tua adquire prudentiam
iustorum autem semita quasi lux splendens procedit et crescit usque ad perfectam diem
vade ad formicam o piger et considera vias eius et disce sapientiam
sex sunt quae odit Dominus et septimum detestatur anima eius
numquid non sapientia clamitat et prudentia dat vocem suam
melior est enim sapientia cunctis pretiosissimis et omne desiderabile ei non potest conparari
Dominus possedit me initium viarum suarum antequam quicquam faceret a principio
qui me invenerit inveniet vitam et hauriet salutem a Domino
principium sapientiae timor Domini et scientia sanctorum prudentia
egestatem operata est manus remissa manus autem fortium divitias parat
odium suscitat rixas et universa delicta operit caritas
in multiloquio peccatum non deerit qui autem moderatur labia sua prudentissimus est
statera dolosa abominatio apud Dominum et pondus aequum voluntas eius
ubi non est gubernator populus corruet salus autem ubi multa consilia
alii dividunt propria et ditiores fiunt alii rapiunt non sua et semper in egestate sunt
via stulti recta in oculis eius qui autem sapiens est audit consilia
fatuus statim indicat iram suam qui autem dissimulat iniuriam callidus est
vult et non vult piger anima autem operantium inpinguabitur
qui parcit virgae suae odit filium suum qui autem diligit illum instanter erudit
est via quae videtur homini iusta novissima autem eius deducunt ad mortem
iustitia elevat gentem miseros facit populos peccatum
responsio mollis frangit iram sermo durus suscitat furorem
in omni loco oculi Domini contemplantur malos et bonos
cor gaudens exhilarat faciem in maerore animi deicitur spiritus
timor Domini disciplina sapientiae et gloriam praecedit humilitas
omnes viae hominum patent oculis eius spirituum ponderator est Dominus
revela Domino opera tua et dirigentur cogitationes tuae
cor hominis disponet viam suam sed Domini est dirigere gressus eius
contritionem praecedit superbia et ante ruinam exaltatur spiritus
melior est buccella sicca cum gaudio quam domus plena victimis cum iurgio
omni tempore diligit qui amicus est et frater in angustiis conprobatur
turris fortissima nomen Domini ad ipsum currit iustus et exaltabitur
antequam conteratur exaltatur cor hominis et antequam glorificetur humiliatur
doctrina viri per patientiam noscitur et gloria eius est iniqua praetergredi
feneratur Domino qui miseretur pauperis et vicissitudinem suam reddet ei
luxuriosa res vinum et tumultuosa ebrietas quicumque his delectatur non erit sapiens
iustus qui ambulat in simplicitate sua beatos post se filios derelinquet
omnis via viri recta sibi videtur adpendit autem corda Dominus
melius est nomen bonum quam divitiae multae super argentum et aurum gratia bona
proverbium est adulescens iuxta viam suam etiam cum senuerit non recedet ab ea
quoniam in similitudinem arioli et coniectoris aestimat quod ignorat comede et bibe dicet tibi et mens eius non est tecum
noli subtrahere a puero disciplinam si enim percusseris eum virga non morietur
sapientia aedificabitur domus et prudentia roborabitur
gloria Dei celare verbum et gloria regum investigare sermonem
sicut urbs patens et absque murorum ambitu ita vir qui non potest in loquendo cohibere spiritum suum
sicut canis qui revertitur ad vomitum suum sic inprudens qui iterat stultitiam suam
ne glorieris in crastinum ignorans quid superventura pariat dies
ferrum ferro acuitur et homo exacuit faciem amici sui
qui abscondit scelera sua non dirigetur qui confessus fuerit et reliquerit ea misericordiam consequetur
qui confidit in corde suo stultus est qui autem graditur sapienter iste salvabitur
in multiplicatione iustorum laetabitur vulgus cum impii sumpserint principatum gemet populus
cum prophetia defecerit dissipabitur populus qui custodit legem beatus est
vanitatem et verba mendacia longe fac a me mendicitatem et divitias ne dederis mihi tribue tantum victui meo necessaria
ne forte saturatus inliciar ad negandum et dicam quis est Dominus et egestate conpulsus furer et peierem nomen Dei mei
aleph mulierem fortem quis inveniet procul et de ultimis finibus pretium eius
ain fortitudo et decor indumentum eius et ridebit in die novissimo
sin fallax gratia et vana est pulchritudo mulier timens Dominum ipsa laudabitur
thau date ei de fructu manuum suarum et laudent eam in portis opera eius
quia Dominus dat sapientiam et ex ore eius scientia et prudentia
misericordia et veritas non te deserant circumda eas gutturi tuo et describe in tabulis cordis tui
omni custodia serva cor tuum quia ex ipso vita procedit
favus enim stillans labia meretricis et nitidius oleo guttur eius
paululum dormies paululum dormitabis paululum conseres manus ut dormias
dic sapientiae soror mea es et prudentiam voca amicam tuam
timor Domini odit malum arrogantiam et superbiam et viam pravam et os bilingue detestor
audite disciplinam et estote sapientes et nolite abicere eam
parabolae Salomonis filius sapiens laetificat patrem filius vero stultus maestitia est matris suae
benedictio Domini divites facit nec sociabitur ei adflictio
ubi fuerit superbia ibi erit et contumelia ubi autem humilitas ibi et sapientia
benefacit animae suae vir misericors qui autem crudelis est et propinquos abicit
qui diligit disciplinam diligit scientiam qui autem odit increpationes insipiens est
abominatio Domino labia mendacia qui autem fideliter agunt placent ei
est quasi dives cum nihil habeat et est quasi pauper cum in multis divitiis sit
sapiens mulier aedificavit domum suam insipiens instructam quoque destruet manibus
qui patiens est multa gubernatur prudentia qui autem inpatiens exaltat stultitiam suam
lingua placabilis lignum vitae quae inmoderata est conteret spiritum
melius est parum cum timore Domini quam thesauri magni et insatiabiles
hominis est animum praeparare et Dei gubernare linguam
abominatio Domini omnis arrogans etiam si manus ad manum fuerit non erit innocens
melior est patiens viro forte et qui dominatur animo suo expugnatore urbium
animus gaudens aetatem floridam facit spiritus tristis exsiccat ossa
labia stulti inmiscunt se rixis et os eius iurgia provocat
ubi non est scientia animae non est bonum et qui festinus est pedibus offendit
multae cogitationes in corde viri voluntas autem Domini permanebit
sicut divisiones aquarum ita cor regis in manu Domini quocumque voluerit inclinabit illud
finis modestiae timor Domini divitiae et gloria et vita
vidisti virum velocem in opere suo coram regibus stabit nec erit ante ignobiles
praebe fili mi cor tuum mihi et oculi tui vias meas custodiant
septies enim cadet iustus et resurget impii autem corruent in malum
mala aurea in lectis argenteis qui loquitur verbum in tempore suo
vidisti hominem sapientem sibi videri magis illo spem habebit stultus
melior est manifesta correptio quam amor absconditus
melior est pauper ambulans in simplicitate sua quam dives pravis itineribus
superbum sequitur humilitas et humilem spiritu suscipiet gloria
omnis sermo Dei ignitus clypeus est sperantibus in se
date siceram maerentibus et vinum his qui amaro sunt animo
qui autem me audierit absque terrore requiescet et abundantia perfruetur malorum timore sublato
ut audiat sapientiam auris tua inclina cor tuum ad noscendam prudentiam
honora Dominum de tua substantia et de primitiis omnium frugum tuarum
audite quoniam de rebus magnis locutura sum et aperientur labia mea ut recta praedicent
non adfliget Dominus fame animam iusti et insidias impiorum subvertet
est qui promittit et quasi gladio pungitur conscientiae lingua autem sapientium sanitas est
qui cum sapientibus graditur sapiens erit amicus stultorum efficietur similis
favus mellis verba conposita dulcedo animae et sanitas ossuum
qui moderatur sermones suos doctus et prudens est et pretiosi spiritus vir eruditus
qui prius respondit quam audiat stultum se esse demonstrat et confusione dignum
ne dicas reddam malum expecta Dominum et liberabit te
facere misericordiam et iudicium magis placent Domino quam victimae
stultitia conligata est in corde pueri et virga disciplinae fugabit eam
vir sapiens et fortis est et vir doctus robustus et validus
qui fodit foveam incidet in eam et qui volvit lapidem revertetur ad eum
fugit impius nemine persequente iustus autem quasi leo confidens absque terrore erit
qui se iactat et dilatat iurgia concitat qui sperat in Domino saginabitur
sanguisugae duae sunt filiae dicentes adfer adfer tria sunt insaturabilia et quartum quod numquam dicit sufficit
deleth quaesivit lanam et linum et operata est consilio manuum suarum
coph surrexerunt filii eius et beatissimam praedicaverunt vir eius et laudavit eam